سفينة لوجوس هوب
لأن الخير مش مجرد مساعدة لإنسان بل بيتسع المفهوم لخدمة مجتمع كامل..
من هنا بدأ دورنا على متن سفينة لوجوس هوب..
فكرنا إزاي بورسعيد الجميلة تظهر لكل المحافظات بشكلها الحقيقي وهي قطعة من أوروبا، وترفع اسم مصر في العالم كله، فبدأنا نشتغل على مدار ٢٦ يوم بدون نوم بدون راحة فريق عمل متكامل.. فريق عمل واحد متشابك مع كل الجهات التنفيذية.
كان المستهدف إن يزور بورسعيد ٥٠ ألف مواطن من محافظات تانية.
وأول ما وصلت السفينة..
١) وقعنا بروتوكول عالمي مع المركب استكمالًا لمبادرتنا #سبتمبر_شهر_الأخلاق واللي بدأناها سبتمبر اللي فات وكنا أول ناس في العالم تنادي بشهر كامل للأخلاق، وطلبنا من لوجوس هوب يشاركوا معانا في نشر الفكرة في كل دولة بيزوروها.
وبموجب البروتوكول ده عملنا توعية لحوالي ٤٠ ألف مواطن من زوار السفينة ببورشورات مترجمة لـ٧ موضوعات أخلاقية مختلفة.
٢) اشتغلنا مع الأجهزة التنفيذية تحت رعاية المحافظة واللواء عادل الغضبان وبشراكات تمويليلة من شركات عقارية كبيرة وعملنا حفل استقبال عالمي للسفينة وكامب متنوع لأبناء محافظة بورسعيد اتعرض فيه المونولوج الشعبي تحت مسرح مشكاة واتعرض مسرح العرايس لأول مرة باللغات، وعربيات الحرف اليدوية اللي صنعتها المؤسسة وبتسوق عليها حرف أكتر من ٤٠٠ عارض، ومعرض رسم وموسيقى عرفنا العالم إن مصر أرض الفن والمواهب وتقبُّل جميع الثقافات وأنشطة تانية كتير اتكلمت عنها كل المحافظات اللي زارتنا وشارك فيها طاقم عمل السفينة بحب واستمتاع.
- حفل استقبال رسالة حب (حفل فرعوني) في ساحة مصر واللي حضره الآلاف من الضيوف، وشارك فيه طاقم عمل السفينة لوجوس هوب.
- الكامب المجتمعي في (حديقة فريال التاريخية) اللي كانت كأنها بيعاد افتتاحها من جديد، شارك فيه طاقم عمل لوجوس هوب وحضره آلاف الزوار والضيوف من مختلف محافظات الجمهورية، وشارك فيه أعداد كبيرة من أصحاب المواهب الفنية والثقافية والحرف اليدوية.
- أخدنا الشباب وطاقم عمل السفينة وروحنا بيهم مزارات بورسعيد كلها، وأكلوا فطير فلاحي وجبنة مِش وعسل واتغدوا سمك وجمبري واتصوروا وهما بيقولوا "تحيا مصر" وكمان قالوا رسايل "تعالوا مصر" و"مصر جميلة" و "مصر آمنة"
وزاروا الأماكن الأثرية ببورسعيد الكنائس والمساجد وشافوا كرم المصريين وعظمة تاريخنا.
- عملنا ماتشات كورة بين فريق لوجوس هوب والنادي المصري بالتعاون مع الشباب والرياضة.
- عملنا على لوجوس هوب "مسرح عرائس مترجم" برسائل أخلاقية ابهرت طاقم السفينة.
- عملنا معرض حرف يدوية بعارضين مختلفين على مدار 3 أسابيع في ساحة مصر علشان ضيوف بورسعيد يشوفوا الإبداع اللي بأيادي البورسعيدية وعلشان كل العاملين على السفينة من كل بلاد العالم يشوفوا إبداع المصريين، كمان أخدوا هدايا منهم كتذكار من محافظة بورسعيد.
- عملنا صداقات مع جنسيات مختلفة هايسافروا لبلادهم برسائل سلام ومبادرة أخلاقية نتمنى إنها تلف العالم كله.
ونتيجة ده وبرعاية ودعم محافظة بورسعيد والسيد اللواء أ.ح عادل الغضبان حصل مجموعة حاجات فرحتنا:
١) نشطت السياحة الداخلية جدًا وزار بورسعيد فوق الـ١٠٠ ألف شخص من خارج بورسعيد.
٢) معارض الحرف اليدوية بتاعتنا اشتغلت والكل باع واتبسط.
٣) المطاعم والمحلات والمواصلات وكل البلد اشتغلت وفرحت.
٤) عملنا نشرات توعية مترجمة انبهر بيها الأجانب وبقوا بيوزعوها معانا في السفينة وهياخدوا منها وهما مسافرين.
٥) عملنا صداقات مع مختلف شعوب العالم من خلال شباب السفينة اللي من أماكن مختلفة في العالم واللي قالوا إن عمر ما اتأثروا في رحلاتهم زي ما اتأثروا بشباب بورسعيد وكرم ضيافتهم وعظمة بلادهم.
6) عملنا لافتات مترجمة عن أهمية القراءة في شوارع بورسعيد، ولافتات مترجمة عن "التنمر" في حديقة فريال.
ما هو الخير لو مش هيتعمل صح بشكل يفيد بلادنا يبقى اسمه خير إزاي؟
احنا بندعو المجتمع المدني في كل المحافظات يدعم قطاع السياحة بإنه يعمل زينا، يشتغل مع الأجهزة التنفيذية ويعمل شراكات تمويلية مع شركات كبيرة عشان يتحملوا مصروفات الأنشطة.
والآن وقت الشكر:
شكرًا محافظة بورسعيد بقيادة اللواء أ. ح عادل الغضبان إنهم وثقوا فينا كمنظمين لجميع الأنشطة ومنسقين لاحتياجات السفينة.
PortSaid Governorate - محافظة بورسعيد
شكرًا شباب لوجوس هوب، كنتم بتقدموا عروضكم الفنية بكل الحب وكمتطوعين معانا وكنا كلنا مع اختلاف ثقافتنا نموذج لنسيج التعايش المتحضر.
Thank you, Logos Hope guys, you were presenting your art shows with love and as volunteers with us, and we were all, with our different cultures, a model of civilized coexistence.
Logos Hope
شكرًا لكل الشركات اللي تحملت جميع تكاليف الفاعليات وكانت سعيدة إنها بتعمل مجموعة حاجات في وقت واحد، بتفرح بلد، بتنشط سياحة، بتحسن الاقتصاد وتزود حركة البيع والشراء و بترسل رسالة عظيمة بقيم مصر وحضارتها وجمالها.
شكرًا لكل الشباب المتطوع الجميل اللي كان بيواصل الليل بالنهار عشان يقدم أحسن ما عنده ويظهر جمال بورسعيد.
شكرًا لكل ضيوف بلادنا من شخصيات عامة وقيادية وإعلامية حضروا وكانوا جزء من نجاحنا لأنهم أظهروا جمال البلد وده شجع الناس تيجي أكتر وأكتر ورجعت بورسعيد بقوة بتحتل المقدمة على خريطة السياحة الداخلية.
وده كان هدفنا اللي اشتغلنا عليه.. لأنه المجتمع المدني دوره وطني قبل ما يكون خدمي.
ومكملين معاكم مشروعنا العملاق اللي بدأ في ٢٠٢٠ تكية مشكاة من مطابخنا ومن مطابخ الناس.. هدفنا نقدم الإطعام من الناس للناس.